അന്തരിച്ച കാനത്തിൽ ജമീലയുടെ സംസ്കാരം ഡിസംബർ രണ്ടിന്

കോഴിക്കോട്: അന്തരിച്ച കൊയിലാണ്ടി എംഎല്‍എ കാനത്തില്‍ ജമീലയുടെ സംസ്കാരം ഡിസംബർ രണ്ടിന്. സംസ്കാരം അത്തോളി കുനിയിൽക്കടവ് ജുമാ മസ്ജിദിൽ നടക്കും. വിദേശത്തുള്ള മകൻ എത്തേണ്ടതുണ്ട്. മൃതദേഹം തിങ്കളാഴ്ച്ച പൊതു ദർശനത്തിനുവയ്ക്കും. അതുവരെ മൃതദേഹം ആശുപത്രിയിൽ സൂക്ഷിക്കും.

അന്തരിച്ച കാനത്തിൽ ജമീലയെ വിവിധ നേതാക്കള്‍ അനുസ്മരിച്ചു. വളരെ ദുഖമുണ്ടാക്കിയ മരണ വാര്‍ത്തയാണ് കാനത്തില്‍ ജമീലയുടേതെന്ന് സിപിഐഎം ജനറല്‍ സെക്രട്ടറി എം എ ബേബി പറഞ്ഞു. 'സഖാവിന്റെ വ്യത്യസ്തമായ പെരുമാറ്റ രീതി എപ്പോളും ശ്രദ്ധിക്കപ്പെടുന്നതായിരുന്നു. ഒരു ജനപ്രതിനിധി എന്ന നിലയില്‍ സ്വന്തം കഴിവ് കൊണ്ട് പല പടവുകള്‍ കയറിയ ആളാണ് കാനത്തില്‍ ജമീല. നിയമസഭാംഗം എന്ന നിലയില്‍ നല്ല രീതിയില്‍ പ്രവര്‍ത്തിച്ചിരുന്ന ആളാണ് കാനത്തില്‍ ജമീല.' എം എ ബേബി പറഞ്ഞു.

കാനത്തില്‍ ജമീല അസുഖം മാറി തിരിച്ചുവരുമെന്ന് പ്രതീക്ഷിച്ചിരുന്നുവെന്ന് മന്ത്രി പി എ മുഹമ്മദ് റിയാസ് പറഞ്ഞു. ഏതാനും ദിവസങ്ങള്‍ക്ക് മുന്‍പ് കണ്ടപ്പോളും ജീവിതത്തിലേക്ക് തിരികെ വരാന്‍ കഴിയുമെന്ന ആത്മവിശ്വാസം കാനത്തില്‍ ജമീല പ്രകടിപ്പിച്ചിരുന്നുവെന്നും മുഹമ്മദ് റിയാസ് പ്രതികരിച്ചു.

കാനത്തില്‍ ജമീലയുടെ മരണം വിശ്വസിക്കാനാവുന്നില്ലെന്ന് സിപിഐഎം നേതാവ് കെ കെ ശെലജ പറഞ്ഞു. 'ഏറ്റവും ഊര്‍ജസ്വലമായി പ്രവര്‍ത്തിക്കുന്ന വനിതാ നേതാക്കളില്‍ ഒരാളായിരുന്നു കാനത്തില്‍ ജമീല. ടീച്ചര്‍ എനിക്ക് സ്വന്തം സഹോദരിയെ പോലെയെന്ന് എപ്പോഴും പറയുമായിരുന്നു. രോഗാവസ്ഥയിലായിരിക്കുമ്പോഴും ജമീല ആത്മവിശ്വാസം പ്രകടിപ്പിച്ചിരുന്നു. വളരെ വേദനാജനകമായ വാര്‍ത്തയാണ് ജമീലയുടെ വിയോഗം.' കെ കെ ശൈലജ അനുസ്മരിച്ചു.

സഹോദര സ്‌നേഹത്തോടെ എല്ലാവരോടും പെരുമാറിയിരുന്ന നേതാവായിരുന്നു കാനത്തില്‍ ജമീലയെന്ന് സിപിഐ സംസ്ഥാന സെക്രട്ടറി ബിനോയ് വിശ്വം അനുസ്മരിച്ചു. 'വിപ്ലവ പാരമ്പര്യമുള്ള കുടുംബത്തില്‍ നിന്ന് വന്നയാളാണ് കാനത്തില്‍ ജമീല. ആത്മാര്‍ത്ഥമായ ജനസേവനത്തിലൂടെ എല്ലാവരുടെയും സ്‌നേഹത്തിന്റെ പങ്കുപറ്റാന്‍ അവര്‍ക്ക് കഴിഞ്ഞിരുന്നു.'

പാർട്ടിക്ക് മികച്ച നേതാവിനെയാണ് നഷ്ടമായതെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദന്‍ പറഞ്ഞു. 'രോഗത്തോട് പോരാടി ജീവിതത്തിലേക്ക് മടങ്ങി വരികയായിരുന്നു കാനത്തിൽ ജമീല, പരിപാടികളിലടക്കം പങ്കെടുത്തു തുടങ്ങിയിരുന്നു അതിനിടെയാണ് മരണം. നല്ല പെരുമാറ്റത്തിലൂടെ ജനഹൃദയങ്ങളില്‍ സ്ഥാനം നേടിയ നേതാവായിരുന്നു ജമീല. പഞ്ചായത്ത് മെമ്പര്‍ ആയി തുടങ്ങി എംഎല്‍എ വരെ ആയി മികച്ച പ്രവര്‍ത്തനം നടത്തി. കേരളത്തിന് അകത്തും പുറത്തും ജനങ്ങളില്‍ സ്വാധീനം ഉണ്ടാക്കാന്‍ അവര്‍ക്ക് കഴിഞ്ഞിട്ടുണ്ട്. പാര്‍ട്ടിക്ക് വലിയ നഷ്ടമാണ് ഉണ്ടായിരിക്കുന്നത്.' എം വി ഗോവിന്ദൻ കൂട്ടിച്ചേർത്തു.

Content Highlight; Late Koyilandy MLA Kanathil Jameela's funeral to be held on December 2